Thenmala
Grama Panchayat

മഴക്കാലപൂർവ്വ ശുചീകരണം: രോഗങ്ങളില്ലാത്ത നാളേയ്ക്കായി കൈകോർക്കാം

വരുംദിനങ്ങളിൽ പെയ്യാൻ പോകുന്ന കനത്ത മഴയെ വരവേൽക്കാൻ നാമൊരുങ്ങിക്കഴിഞ്ഞോ? മഴക്കാലം സന്തോഷത്തോടൊപ്പം ഒരുപിടി പകർച്ചവ്യാധികളെയും കൂടെക്കൂട്ടാറുണ്ട്. എന്നാൽ, മുൻകൂട്ടിയുള്ള ചെറിയ ചില കരുതൽ നടപടികളിലൂടെ രോഗങ്ങളെയും ദുരന്തങ്ങളെയും നമുക്ക് ഒരുപരിധി വരെ തടഞ്ഞുനിർത്താം. ഇതിനായി നമുക്ക് ഒന്നിച്ച് ഇറങ്ങാം... 'മഴക്കാലപൂർവ്വ ശുചീകരണത്തിന്'.

മഴ പെയ്യുന്നതോടെ ജലസ്രോതസ്സുകൾ മലിനമാകാനും കൊതുകുകൾ പെരുകാനും ഉള്ള സാധ്യത വളരെ കൂടുതലാണ്. ഡെങ്കിപ്പനി, എലിപ്പനി, ചിക്കുൻഗുനിയ, കോളറ, ടൈഫോയ്ഡ് തുടങ്ങിയ മാരക രോഗങ്ങൾ പടർന്നുപിടിക്കാതിരിക്കാൻ വീടും പരിസരവും വൃത്തിയായി സൂക്ഷിക്കേണ്ടത് അനിവാര്യമാണ്.

തെന്മല ഗ്രാമപഞ്ചായത്തിന്‍റെ 17 വാർഡുകളിലും മഴക്കാല പൂർവ്വ ശുചീകരണത്തിന്‍റെ ഭാഗമായി വിവിധ പ്രവർത്തികൾ പൂർത്തികരിച്ചിട്ടുള്ളതാണ്.

                                                പ്രധാന പ്രതിരോധ പ്രവർത്തനങ്ങൾ

1. കൊതുകിന്റെ ഉറവിട നശീകരണം (Dry Day ആചരിക്കാം)

• വീടിന്റെ പരിസരങ്ങളിലും ടെറസിലും ഉള്ള ചിരട്ടകൾ, പ്ലാസ്റ്റിക് കപ്പുകൾ, ടയറുകൾ, മുട്ടത്തോടുകൾ എന്നിവയിൽ വെള്ളം കെട്ടിക്കിടക്കാൻ അനുവദിക്കരുത്.
• ഫ്രിഡ്ജിന്റെ ബാക്ക് ട്രേ, മണിപ്ലാന്റ് വളർത്തുന്ന പാത്രങ്ങൾ എന്നിവയിലെ വെള്ളം ആഴ്ചയിലൊരിക്കൽ മാറ്റുക.
• ആഴ്ചയിലൊരിക്കൽ ഞായറാഴ്ചകളിൽ 'ഡ്രൈ ഡേ' ആയി ആചരിച്ച് കൊതുകിന്റെ ഉറവിടങ്ങൾ നശിപ്പിക്കുക.

2. ശുദ്ധമായ കുടിവെള്ളം ഉറപ്പാക്കുക

• കിണറുകളിലും മറ്റ് ജലസ്രോതസ്സുകളിലും മലിനജലം കലരാതിരിക്കാൻ ചുറ്റുമതിൽ കെട്ടി സംരക്ഷിക്കുക.
• കിണറുകൾ ക്ലോറിനേഷൻ (Chlorination) ചെയ്യുക.
• തിളപ്പിച്ചാറ്റിയ വെള്ളം മാത്രം കുടിക്കാൻ ഉപയോഗിക്കുക.

3. വ്യക്തിശുചിത്വവും എലിപ്പനി പ്രതിരോധവും

• കട്ടിപ്പനിയോടൊപ്പം പേശിവേദനയും ഉണ്ടാകുന്ന എലിപ്പനിയെ (Leptospirosis) കരുതിയിരിക്കുക.
• ഓടകളിലും മലിനജലത്തിലും ഇറങ്ങി ജോലി ചെയ്യുന്നവർ നിർബന്ധമായും കൈയുറയും ഗംബൂട്സും ധരിക്കുക.
• ആരോഗ്യപ്രവർത്തകരുടെ നിർദ്ദേശപ്രകാരം എലിപ്പനി പ്രതിരോധ ഗുളികയായ 'ഡോക്സിസൈക്ലിൻ' കഴിക്കുക.

4. വീടും പരിസരവും സുരക്ഷിതമാക്കൽ

• വീടിനോട് ചേർന്ന് നിൽക്കുന്ന അപകടകരമായ മരച്ചില്ലകൾ വെട്ടിമാറ്റുക.
• അഴുക്കുചാലുകളിലെ തടസ്സങ്ങൾ നീക്കി ഒഴുക്ക് സുഗമമാക്കുക.
• പ്ലാസ്റ്റിക് മാലിന്യങ്ങൾ വലിച്ചെറിയാതെ കൃത്യമായി സംസ്കരിക്കുക.

ശ്രദ്ധിക്കേണ്ട മറ്റ് കാര്യങ്ങൾ

• ആഹാരം: പഴകിയതും തുറന്നുവെച്ചതുമായ ഭക്ഷണപദാർത്ഥങ്ങൾ കഴിക്കരുത്.
• സ്വയംചികിത്സ അരുത്: പനിയോ മറ്റ് രോഗലക്ഷണങ്ങളോ കണ്ടാൽ സ്വയംചികിത്സ നടത്താതെ എത്രയും വേഗം അടുത്തുള്ള പ്രാഥമിക ആരോഗ്യ കേന്ദ്രത്തിൽ കാണിക്കുക.

                            "ആരോഗ്യമുള്ള നാളേക്ക്, വൃത്തിയുള്ള പരിസരം"

നമ്മുടെ ഒരു ചെറിയ അശ്രദ്ധ വലിയൊരു വിപത്തിന് കാരണമായേക്കാം. തദ്ദേശ സ്വയംഭരണ സ്ഥാപനങ്ങളുടെയും ആരോഗ്യ പ്രവർത്തകരുടെയും നിർദ്ദേശങ്ങൾ പാലിച്ചുകൊണ്ട്, നമുക്ക് നമ്മുടെ വീടും നാടും വൃത്തിയായി സൂക്ഷിക്കാം